Umaboten iti uppat ti bilang dagiti natay iti bisperas ti Baro a Tawen, segun iti kaudian a rekord ti Department of Health (DOH) kadagiti firecracker-related injuries.
Ti kaudian a biktima ket maysa nga agtawen iti limapulo ket uppat a lalaki manipud Region 4A kalpasan a naputokan iti kwitis.
Gapu iti daytoy, tallo ti natay gapu iti panagusar iti paputok, idinto a maysa ti gapu iti naiwawa a bala.
Maibasar iti record ti DOH, dimmanon iti 832 ti kaso ti nadangran gapu iti paputok manipud December 22, 2024 agingga January 5, 2025.
Nangatngato daytoy iti 37% no iyarig iti 606 a kaso a nairekord iti isu met laeng a panawen ti napalabas a tawen.
Kadagiti biktima, 491 ket agtawen iti sangapulo ket siam agpababa ti tawenda idinto a 341 ti agtawen iti duapulo agpangato, ken 685 ti lallaki ken 147 ti babbai.
Kwitis ti kangrunaan a pakaigapuan ti pannakadangran dagiti biktima, sarunuen ti 5-Star ken boga.
