Impasigurado ni Barangay Captain Marco De Peralta a maikali ti baboy a natay a nasarakan iti karayan iti Barangay Bucalag, Santa, Ilocos Sur tapno saan nga agatibuor ti angotna ken maliklikan ti pannakaiwaras ti sakit nga African Swine Fever.
Iti pannaki-uman ti Bombo Radyo Vigan ken ni De Peralta, saan a damo a mapasamak nga adda maibelleng a natay a baboy iti karayan isu a siguradoenna a tignayanda tapno maisardeng ti kastoy nga aramid ken awan dagiti sabali pay a mairaman agsipud ta mapapati a ti nasao a baboy ket adda sakitna nga ASF.
Malaksid dayta, ikagumaanda a kitaen iti listaan dagiti agtartaraken iti baboy iti nasao a barangay tapno mabigbig no asino ti nangibelleng.
Mapatta-patta a ti natay a baboy a nasarakan ket adda tallo nga aldawnan iti nasao a karayan ta ngilngilawenen ken adda nabangsit nga angotnan.
Nupay kasta, kiddawenna iti tunggal agindeg a no adda sakit dagiti tarakenda a baboy ket ireportda kadagiti maseknan tapno maaramid ti husto a tignay.
