VIGAN CITY – PHP9,830 a gatad ti grocery products ti natakaw iti SAVEMORE Corporation, Barangay San Antonio, Candon City.
Nabigbig ti biktima a ni Jenyvive Barba Paringit, agtawen iti duapulo ket lima, taga-Barangay Olo, Olo, Santiago, representative iti nasao a mall, idinto a ti suspek ket ni Jhaylord Rivera Ucol, agtawen iti duapulo, taga-Barangay 3rd Kayang, Hilltop, Baguio City.
Iti inisyal nga imbestigasyon, sakbay ti pasamak, nakita ni Melba Furoc a naka-duty iti akin laud a pagserkan ken pagruaran ti SAVEMORE ti suspek a magmagna a mapan iti ayanna.
Kas protocol ti kompania, sinaludsod ti gwardya ti suspek no ayan ti resibo dagiti banag nga adda iti black shoulder bag na ngem awan ti naiparangna no di ket timmaray a nagpadaya.
Gapu dayta, nagpatulong ni Furoc iti kaduana a gwardya a ni Joselito Clava a dagus met a nagresponde ken nangtiliw iti suspek sa da impan iti cuerpo ti pulisya.
Dagiti adda iti uneg ti bag ti suspek ket pakairamanan ti duapulo ket uppat a Yamang Bukod Turmeric with Gyunura Procumbers 400g, dua a klase ti cotton buds, maysa a feminine wash ken maysa a conditioner a 340ml.
Nupay kasta, maisagsaganan ti pannakaipila iti kaso kontra iti suspek.
