VIGAN CITY – Mapatta-patta a PHP93,996 dagiti natakaw nga uppat nga Unit a Samsung Tablet nga aggatad ti Php23,499 ti tunggal maysa iti uneg ti Principal’s office ti Don Francisco Quilala Elementary School, Brgy. Baliw, San Juan.
Nabigbig ti principal iti nasao a pagadalan a ni Zosima Sarmiento Villaflor, agtawen iti limapulo ket siam, ken residente ti nasao a lugar idinto ti suspek ket saan pay a nabigbig.
Iti pannaki-uman ti Bombo Radyo Vigan ken ni Police Staff Sergeant Dheu Alibin, case investigator ti San Juan Muncipal Police Station, kabayatan iti panagdaldalus ti principal ken dagiti kaduana a mangisursuro iti agarup alas onse ti bigat, nadlawda a nadadael ti steel cabinet a nakadulinan ti 15 units ti Samsung Tablet, ket dita a natakuatanda a mapukpukaw ti uppat nga unit ti Tablet.
Basar iti imbestigasyon, ti mapapati a nagserkan ken nagruaran ti suspek ket iti tawa ti CR iti Principal office ta naikkat ti sliding window ken adda naala a maysa a martillo, kutsilyo ken plastic ti candy.
Agtultuloy pay laeng iti naan-anay nga imbestigasyonda para ti pakabigbigan ken no mano dagiti suspek ta awan iti CCTV ti nasao a lugar.
Malaksid pay dayta, nangisayangkat da pay ti imbestigasyon iti kabangibang a lote a kukua ni Joren Frado Sarmiento, agnaed met iti nasao a lugar.
Segun ken ni Sarmiento, agsapa ti Nobiembre 4, nakitana a nadadael ti alad na nga interlink nga asideg ti kalsada ken dagiti mula na ket binaddebaddekan dagiti suspek.
Innayon pay ni Police Staff Sergeant Alibin, iti kinabayag nga awan serrek dagiit mangisursuro ken estudayante gapu ti holiday ket saanda a nadlaw nga adda nakaskastrek a mapan agtakaw kadagiti tablet nga inusar da idi pandemic para iti online classes.
