VIGAN CITY – Umabot iti nasurok sangagasut a ribo a pisos ti naala manipud iti biktima iti online scam idiay Maynganay Sur, Sta. Maria
Nabigbig ti biktima a ni Shayne Joyce Quintal, agtawen iti duapulo, online seller nga agnaed idiay Pantay Tamurong, Caoayan idinto a ti suspek ket ni Clarissa Del Rosario nga agnaed idiay Brgy Poblacion Bustos, Bulacan.
Iti pannaki-uman ti Bombo Radyo Vigan ken ni P/Lt. Joel Dasargo, officer-in-charge iti Sta. Maria Police Station, idi pay laeng a rinugianna ti agnegosyo online ket nangipatulod iti bayadna iti suspek a nagangkatanna kadagiti gadgets idi August 31 agingga September 8 ngem ita ket awan pay laeng dagiti inorderna.
Umuna a gundaway ti biktima a makipagtransaksyon iti nasao nga online seller ngem insigida a namati kenkuana gapu kadagiti pammaneknek a nakitkitana babaen met laeng iti online.
Nupay kasta, PHP 16-K pay laeng ti in-inut a naisubli ti suspek a kuarta ti biktima manipud iti PHP 119, 000 a bayadna koma ta idi September 24 ket adda ti pakauna a bayadna a PHP6-K ken idi September 26 ket nakaipatulod manen ti PHP 10-K.
Agtultuloy ti imbestigasyon dagiti kameng ti Sta. Maria Police Station ken ti pannakikinnammayetda iti Bulacan PNP tapno matakuatan no datin nga addan ti rekord ti suspek kadakuada.
