VIGAN CITY – Tallopulo a plastic bag ti one day old chick ken uppat a plastic bag ti kwek-kwek nga aggatad iti PHP48,400 ti nasalamaan dagiti nakabantay iti Animal Quarantine Checkpoint idiay Brgy. Gabur Sur, Sta. Cruz.
Dagiti produkto ket naikarga iti Mitsubishi L300 a minaneho ni Ismael Fariando, agtawen iti tallopulo ket tallo a taga-Brgy. Sto. Cristo, San Antonio, Nueva Ecija ken ti kaduana a da Mary Ann Andrada, agtawen iti tallopulo a taga-Davao Del Sur ngem agtaltalinaed idiay Gapan, Nueva Ecija.
Segun ken ni Provincial Quarantine Officer Martel Quitoriano, awan ti veterinary certificate, shipping permit ken saan nga accredited ti luganda nga agipastrek kadagiti produkto.
Nupay kasta, nagmuelta dagiti nagipastrek iti kontrabando a naikali itan iti ili ti Sta. Cruz idinto a nagballaag met ti opisial iti publiko a saanda nga agor-order iti online kadagiti meat products ta masapul a masigurado nga umuna no adda naan-anay a papelesda.
