VIGAN CITY – Nasurok tallo gasut a ribo a pisos a gatad ti maatap a shabu ken bala ti nakumpiskar dagiti pannakabagi ti linteg iti panangiwayatda ti search warrant operation iti pagtaengan ti maysa a street level individual idiay Barangay Pug-os, Sinait, Ilocos Sur.
Ti suspek ket ni Jack Ruby Ines, agtawen iti tallopulo ket pito, agnaed iti nasao a lugar.
Nakumpiskar dagiti pannakabagi ti linteg ti 46.8 grams ti maatap a shabu nga aggatad iti PHP318,240 a naikabil iti sangapulo ket maysa a piraso iti heat sealed transparent plastic sachet.
Malaksid dayta, adda pay ti uppat a bala ti 9mm a paltog.
Iti pannaki-uman ti Bombo Radyo Vigan ken ni Police Captain Bryan Lopez, nabayagen a sinipsiputanda ti suspek ta datin nga adda kasona ken na-buybust manen idin iti ili ti Cabugao.
Innayon ni Lopez a nalawa ti sakup ti operasyonna ta saan laeng nga iti ili ti Sinait.
Saan a natiliw dagiti pannakabagi ti linteg ti suspek, idinto a dagiti naala nga ebidensya ket nakakustodian iti Sinait Police Station.
