VIGAN CITY – Pakabuklan a PHP265K ti gatad a naipatulod ti biktima iti pananglimlimo a ni Natasha German Abaya, agtawen iti uppat a pulo ket uppat, negosyante, agnaed iti Barangay San Isidro, Candon City.
Segun iti biktima, alas dose singkwenta y singko, nakaawat iti tawag manipud iti maysa a babai nga agsasao iti Ingles ket nagpabigbig a kas Angeline Delos Santos Ordonia, maysa a District Prosecutor ket sapsapulenna ti kasinsin ti biktima a ni Elvis Imperial nga adda kasona iti iligal a droga ket nangidiaya iti tulong tapnon madismiss ti kaso.
Iti panagpatpatangda, nangted iti tallo a pagpiilian ti suspek – umuna, ikkanna iti PHP189K a pyansa kasukat ti pannaka-wayawayana; maikadua ket plea bargaining idinto a ti maikatlo ket ti panangituloyna iti kaso a tungpal biag ti sentensyana.
Ala una trenta y dos iti malem, napan ti biktima iti maysa a drug store idiay Barangay San Jose, Candon City ket pinatulodanna iti PHP95K babaen ti numero ti babai a nangtawag kenkuana babaen ti pay and go.
Kalpasan ti panangipatulod ti biktima iti kuarta, kinuna ti suspek a no saanda a makompleto ti gatad ket iruarda ti kasona ken innayonna nga uray makaiggemda iti maysa a milion ket saanda daytoy a mairuar.
Tapnon makompletoda ti PHP190K, alas dos bainte kuatro iti maalem, nagipatulod manen ti biktima iti sabali pay a PHP95K.
Sipud dayta, binagaan manen isuna ti suspek a dua ti kasona – section 5 ken section 15 isu a kunana nga agipatulod pay iti PHP75K tapno mawaswasen ti kasona ket makaruaren nga insigida iti pagbaludan.
Alas tres singkwenta y otso iti malem, nagipatulod manen ti biktima iti PHP25K iti sabali manen nga account number babaen iti GCASH ken iti alas kuatro trese iti malem, nagipatulod pay iti PHP50K.
Sipud dayta, saanen a simmungsungbat ti suspek iti tawag ti biktima kalpasan ti pannakaipatulodna ti nasao a gatad.
