VIGAN CITY – Nasurok PHP13K a gatad ti iligal a droga ken paltog ti nakumpiskar iti pagtaengan ti maysa a High Value Individual babaen iti naiwayat a search warrant operation iti Barangay VIII, Vigan City, Ilocos Sur.
Nabigbig ti subject ti operasyon a ni Delmar Cabarles Dayoan alyas “Don Delmar”, agtawen iti tallopulo, Perya Employee, agnaed iti nasao a lugar.
Ti search warrant ket inruar ti Vice Executive Judge ti RTC, First Judicial Region, Branch 20, Vigan City, napetsaan iti June 26, 2024.
Nakumpiskar dagiti operatiba manipud iti pagtaengan ti suspek ti dua a gramo ti maatap a shabu nga aggatad iti PHP13,600 a naikabil iti sangapulo ket dua a piraso ti small heat-sealed transparent plastic sachet ken maysa a piraso ti small unsealed transparent plastic sachet.
Dagiti non-drug evidence ket pakairamanan ti double mint container, nabtak nga improvised glass totter, glass jar, nangisit a lupot, holster ken caliber 38 a paltog nga adda kargana nga innem a bala.
