VIGAN CITY – PHP10,260 ti pakabuklan a gatad dagiti natakaw manipud kadagiti lima a kameng iti Municipal Social Welfare Development ken 4Ps office idiay Barangay San Julian, Magsingal.
Nabigbig dagiti biktima a da Rica Mae Reynon, agtawen iti duapulo ket uppat, social welfare aide, a taga-Barangay Alangan, Magsingal; Jane Bacuya Tipon, agtawen iti uppat a pulo ket uppat, disability affairs assistant iti LGU Magsingal a taga-Barangay Panay Norte; Eden Pando Tabuan, agtawen iti uppat a pulo ket dua, taga-Barangay Laoingen, Sto. Domingo; Ansherina Galaze Collado, agtawen iti tallopulo, Admin aide iti LGU Magsingal, a taga-Barangay Bacar; ken ni Rizamay Tacata Cacay, agtawen iti tallopulo ket lima, social welfare aide, taga-Barangay Napo.
PHP6,500 ti natakaw manipud ken ni Reynon; PHP600 manipud ken ni Tabuan; PHP2,500 manipud ken ni Tipon; PHP260 manipud ken ni Collado; ken ni PHP400 manipud ken ni Cacay.
Alas syete deyes iti June 26 idi pinanawanda dagiti alikamenda pakairamanan ti kuartada iti opisinada ket napanda iti sangwanan ti Municipal Hall tapno atendaran ti flag raising ceremony.
Kalpasan ti aktibidad, nagsublida iti opisinada ket nadlawda a mapukpukaw ti kuartada.
Nangisayangkat dagiti pannakabagi ti linteg iti follow up investigation ket basar iti CCTV footage manipud iti opisina ti Rural Health Unit, Magsingal, maysa a lalaki a nakasuot iti puraw a tshirt ken nangisit a hoodie jacket ti nangitaray iti kuarta.
