VIGAN CITY – 37.5 a kilo ti frozen beef products nga aggatad iti PHP 15,625 a naikarga iti van ti nasalamaan dagiti pannakabagi ti linteg iti animal quarantine checkpoint idiay Bio, Tagudin.
Nabigbig ti nagipastrek iti nasao a kontrabando a ni Ryan Nicole Antoporda Nicolas, agtawen ti tallopulo ket pito nga agnaed idiay Rodriguez, Rizal a namuelta gapu ta saanda a nakompleto dagiti requirements sakbay a makaipastrekda ti aniaman a meat products.
Iti pannaki-uman ti Bombo Radyo ken ni Provincial Quarantine Officer Martel Quitoriano, agkurang dagiti dokumento ti suspek nga impakitana agsipud ta adda ti dokumentona a naggapu iti National Meat Inspection Service ngem awan ti shipping permit dagiti produkto nga ipastrekna isu a namuelta.
Malaksid ti dayta, saan pay nga accredited ti luganna nga agipastrek kadagiti produkto iti karne isu a pinalagipan manen ni Quitoriano ti tunggal maysa a rumbeng a sumurotda ti paglintegan ken kiddawenna ti panangawat ti publiko iti nainget a panangbantayda kadagiti quarantine checkpoints gapu iti African Swine Fever.
Naipanen iti Provincial Veterinary Office dagiti nasalamaan a kontrabandopara iti proper disposition.
