VIGAN CITY – Pakabuklan a P67,200 a gatad ti ganagan iti mapapati a nakatakaw iti municipal warehouse idiay Barangay Paratong, Narvacan.
Segun ti Narvacan Municipal Police Station, dagiti suspek ket da Antonio Alvarez Casallo, agtawen iti uppat a pulo ket innem, naasawaan nga agnaed idiay Brgy. San Pedro, Narvacan ken Alfred Gatchalian, a mapapati a taga-Burgos idinto a ti nagreport ket ni Gary Javier Cardona, agtawen iti uppat a pulo ket walo, naasawaan, OIC Municipal Agriculturist nga agnaed idiay Brgy. Codoog, Narvacan.
Nakita ni Julie Anne Pira a taga-Paratong Narvacan dagiti suspek ken maysa pay a saan a nabigbig a lalaki a nagala iti sako iti ganagan iti nasao a warehouse ken pimmanaw. Kalpasan laeng iti sumagmamano a minutos ket nagsubli-subli manen dagiti lallaki ken nangala manen iti ganagan.
Kiniddaw ni Julie ti asawana a ni Alvin Fuerto Pira a caretaker iti bodega nu adda bilin ti panagala iti ganagan ket kinunana nga awan isu nga impakammo ni Alvin ken ni Cardona ngem saanna a dagus nga impakammo iti PNP ta namnamaenda a maisubli ngem idi saan a naisublin ket inreport-dan kadagiti pannakabagi ti linteg.
Iti imbestigasyon babaen ti CCTV, nabigbig dagiti suspek ken nu sadino iti nangilakoanda kadagiti ganagan ket dayta laengen a naamoanda a duapulo ket walo gayam a sako iti ganat Fertilizer nga aggatad iti P67,200 iti tinakaw dagiti suspek.
Amin a ganagan ket narekubre iti warehouse ni Marilyn Ciubal a masarakan idiay Brgy. San Jose, Narvacan.
Makikamkammayet iti Department of Agriculture – Narvacan para iti affidavits dagiti witness ken ti reportee ken agsapsapulda pay iti adadu nga ebidensya para iti prosecution dagiti nainaig iti mapapati a panagtakawan.
