Nasurok P210 billion pesos wenno 3.4 billion dollars ti gatad ti investment manipud kadagiti Japanese businessmen ti naselyoan ti Pilipinas kagiddan ti state visit ni Presidente Ferdinand Marcos Jr idiay Japan.
Nagun-od daytoy iti naisayangkat a high-level business roundtable meeting idiay Tokyo ket personal a nakitaripnong ni Marcos kadagiti Japanese investor.
Target dagiti investment ti manufacturing, renewable energy, turismo, infrastructure, ken dadduma pay nga industria a manamnama a mangpataud iti trabaho para kadagiti Pilipino.
Segun ken ni Trade Secretary Cristina Roque, nakasagana ti Pilipinas nga agbalin a sentro ti smart manufacturing ken green investment iti ASEAN.
Nagyaman met ti presidente kadagiti Japanese investor nga agtaltalek latta iti ekonomia ti pagilian ken panangted gundaway ken trabaho kadagiti Pilipino.
