Naisayangkat ti Ceremonial Destruction and Disposal ti Confiscated and Surrendered Illegal Firecrackers and Pyrotechnic Devices kas paset iti agtultuloy a panangipasigurado iti kinatalged ken maliklikan dagiti fire-related incidents.
Napasamak daytoy idiay Camp Elpidio Quirino, Bulag, Bantay, Ilocos Sur a dinar-ayan ni Randy Dela Rosa, Provincial Director ti Department of Interior and Local Government-Ilocos Sur, Provincial Disaster Risk Reduction and Management Officer Rhon Arquelada ken ni Fire Senior Superintendent Ramel Borja, Provincial Fire Marshal nga imbagi ni Fire Chief Inspector Rex Dela Cruz.
Iti pannaki-uman ti Bombo Radyo Vigan ken ni PLTCOL. Rogelio Remiendo Jr., P27,697 ti gatad dagiti nadadael a palpalibang a pakairamanan ti 330 a boga, 121 a dartbomb, 324 a kwitis, 4 a Judas belt, ken 17 a 3-star labentador.
Dagiti boga ket naatalan iti backhoe idinto a naipisuk iti danum dagiti palpalibang.
