P179.14 million a gatad ti mapapati a shabu ti nakita a tumtumpaw iti kabaybayan ti maysa a mangngalap idiay Barangay Puro, Magsingal, Ilocos Sur.
Nabigbig ti mangngalap a ni Nestor Tab Tiqui, agtawen iti uppat a pulo ket lima, taga-Sitio Nagpartian.
Impakaammo ni Barangay Captain Bernardino Buena Talapian ti pannakadiskubre ti maysa sako a naglaon iti duapulo ket dua a pakete ti yellow/orange a plastic a namarkaan iti ‘ALISHAN JIN XUAN TEA’ ken tallo a transparent plastic packs a namarkaan iti ‘66’ a dagitoy ket naglaon iti mapapati a shabu nga agdagsen iti 26.34 kilograms ken aggatad iti Php179,146,000.
Dagiti kontrabando ket nakita iti kaadayo a duapulo a milya manipud iti igid ti kabaybayan, abagatan ti Puro, Magsingal ken laud iti ili ti Sta. Catalina.
Segun ken ni Tiqui, agaw-awid a nakalugan iti bilogna idin ta nadlawna ti tumtumpaw a puraw a sako ket innalana sa impakaammoda nga insigida kadagiti pannakabagi ti linteg.
Impasigurado met ti kapitan ti barangay ti pannakabantay dagiti mangngalap nga aggapu iti taaw tapno maliklikan ti panagipuslit no adda dagiti kontrabando a madiskubreda.
Kiddawna kadagiti adda makitkitana a kastoy a banag nga ipakaammoda a dagus kadakuada tapno matignayan.
