VIGAN CITY – Naikali idi September 11, idiay motorpool ti Tamag, Vigan City iti nasurok maysa a tonelada nga imported a karne a naggapu idiay La Union a maideliver kuma idiay Sta. Cruz babaen ti driver a ni Nico Alba nga agtawen ti dua pulo ket innem nga agnaed iti nasao nga ili.
Segun ken ni Provincial Quarantine Officer Martel Quitoriano, dagiti nasao a karne a ti pakabuklan a dagsen na ket sangaribo ket innem a pulo a kilos a naikarga kadagiti innem a pulo ket dua a karton ken nailugan iti Hyundai close van ket awan iti legal a dokumento na.
Agsipud iti dayta, sumango iti nagmaneho ti close van iti panaglabsing ti section 4, paragraph B, G ken I ti Provincial Ordinance Number 15 – 06 series of 2015 ta awan iti naan-anay a dokumento dagiti nasao a produkto a maiserrek kuma ditoy probinsiya ken linibasan pay iti nagmaneho iti close van ti quarantine checkpoint idiay Bio, Tagudin idi alas dyes trenta y singko iti rabii ti September 10.
Malaksid iti nasao a panaglabsing, sumango pay ni Alba iti kaso a panaglabsing ti Executive Ordinance Number 24 series of 2019 inaig iti temporaryo a pannakaiparit iti pannakaiserrek ditoy probinsiya kadagiti maparti a baboy, kasta payen dagiti frozen hog meat gapu iti pangta ti African Swine Fever virus.
