VIGAN CITY – Nasurok kumurang tallo gasut a ribo a pisos ti inisyal a mapatta-patta a gatad iti nauram a sanikua iti maysa a balay idiay Brgy. San Isidro, Candon City a kukua ni Florante Escobar, agtawen iti innem a pulo ket siam.
Iti pakpakauna nga imbestigasyon, mangmangan iti kusinada ni Escobar idin ta iti alas otso singkwenta y singko iti agsapa ket impakaammo ti apona a ni Kyle Ashley Escobar a maur-uram ti dadduma a paset ti balayda.
Rimuar ni Escobar ket nakitana ti maur-uram a kwarto ti putotna a ni Florante Escobar Jr. isu nga insigida a nagbakwitda a napan iti kalsada.
Nagresponde dagiti kameng ti Bureau of Fire Protection ket nadepdepda ti apoy iti alas nuebe dyes iti agsapa idinto nga agtultuloy ti panangduktalda no mano ti gatad ti nauram a sanikua.
