VIGAN CITY – Nasurok – kumurang innem a pulo a gramo wenno aggatad ti P420,000 ti mapapati a shabu ken 6.50 a gramo wenno aggatad ti P744 a fresh marijuana leaves iti naala manipod iti tallo a suspek iti naisayangkat a buy bust operation idiay Sitio Limmansangan, Barangay Margaay, Narvacan.
Iti pannakipapatang ti Bombo Radyo Vigan ken ni Philippine Drug Enforcement Agency Regional Office 1 – Ilocos Sur Provincial Officer Anabel Cabarles, dagiti suspek ket da Rogelio Lacbayan Banggao a taga-Paoay, Ilocos Norte; Romeo Lopez Gonzaga a taga-Tondo, Manila ken Violito Baldonado Bendanio a taga-Bulacan.
Segun ken ni Cabarles, nagkukuyog dagiti suspek a naggapu idiay National Capital Region a mapapati a nagtaudan dagiti kontrabando ket apaman a nakadanonda iti Narvacan ket isun ti nakatiliwanda.
Naala pay kadakuada iti maysa a piraso iti sangaribo a pisos, duapulo ket uppat a piraso iti boodle money, uppat a piraso iti android phone, maysa a piraso iti key pad basic cellphone, maysa a bundle iti empty sachets, maysa a lighter, maysa toother, maysa a blue sling bag, maysa a blue pouch, ken dua a face mask.
Gapu dayta ket sumango dagiti nakemmeg iti panaglabsing iti Section 26 paragraph b inaig iti Section 5 ken Section 11 iti Article 2 iti Republic Act 9165.
VIDEO – PDEA RO1 – ILOCOS SUR PROVINCIAL OFFICER ANABEL CABARLES
