VIGAN CITY – Kinemmeg dagiti otoridad ta naglabsing ti Animal Quarantine Ordinance ti probinsya dagiti nakalugan ti maysa a Isuzu Crosswind idiay Brgy. San Nicolas, San Esteban.
Nabigbig ti driver a ni Juanito Navarro III agtawen dua pulo ket maysa ken ti kadduana a menor de edad nga agtawen sangapulo ket pito agpada nga agnaed ti Sta. Rita West, Aringay La Union.
Basar ti report manipod ti San Esteban Municipal Police Station, impakammua kadakuada ti Santiago Municipal Police Station nga adda ti lugan a na-flat ti pilid na iti national highway ket nadlawda nga adda iti tedted ti naangot a dara.
Nagturong dagiti pulis iti nasao a lugar ket naduktalanda nga aglaon iti nadumaduma a frozen prodcuts ti Isuzu Crosswind nga agdagsen ti nasurok kumurang lima gasut a kilo manipod Aringay, La Union a maipan kuma idiay Batac, Ilocos Norte.
Awan iti naipakitada dagiti nakalugan a naananay a dokumento iso nga impakammuda ti Animal Quarantine Office.
Ti agdama nakakustodiya dagiti dua idiay San Esteban PNP para iti naananay a disposisyonda.
