VIGAN CITY – Nasurok innem a gasut ti nabakunaanen nga ubbing nga agtawen iti lima agingga sangapulo ket maysa iti siudad ti Vigan sipud nangrugi ti vaccination rollout idi February 14.
Target ti siudad ti makabakuna iti sangaribo isu a nagparehistroda iti makalawas a panagbakuna ngem 1,500 ti addan iti listaan a manamnama a mabakunaan iti las-ud iti pito agingga sangapulo nga aldaw.
Malaksid iti siudad ti Vigan, addan met pito gasut nga agtawen iti lima agingga sangaulo ket maysa a nabakunaan ti ili a Tagudin segun ti Municipal Health Office.
Karaman a naipaayan iti bakuna ti lokal a gobierno ti Santa Cruz, Bantay, Gregorio del Pilar, Santa Maria, ken Candon City.
Agtultuloy met ti panangallukoy ni Vigan City Mayor Juan Carlo Medina kadagiti residente nga agpabakunan.
