VIGAN CITY – Lima gasut ket lima a ribo a pisos (PHP505K) ti mapapati a natakaw manipud iti maipatpatakder a pagtaengan ni Marjorie Recaido, agtawen iti tallopulo a taga-Immayos Sur, San Juan nga igatangda koma iti lugan.
Iti pannaki-uman ti Bombo Radyo Vigan ken ni PLt. Roland Villaluz, patien ti biktima a dagiti uppat nga armado a lalaki a suspek a nangserrek iti pagtaenganna ket isu dagiti terorista a napan dimmawat kenkuana iti tulong ken nakakita iti kuarta ngem pinasingkedan met dagiti walo nga ubbing a kaduada a matmaturog iti pagtaengan nga awan ti napasamak a panagtakawan kasta payen dagiti karrubada nga awan pulos nadlawda ta natalna ti arubayan ken arigna awan pay nagtataol nga aso.
Pinasingkedan ti biktima matmaturogda ti anakna iti uneg ti maysa a kuarto idin ta sinerrek dagiti uppat nga armado a suspek iti nasao a pagtaengan nga awan pay laeng ti tawa ken ridawna.
Innala dagiti suspek ti nasurok gudwa a milion a pisos a nakaikabil iti plastic cabinet ket sakbay a naglibasda ket inikkanda iti packing tape ti ima ken ngiwat ti biktima.
Nupay kasta, im-imbestigaranen dagiti pannakabagi ti linteg ti San Juan Police Station tapno maduktalan no ania ti husto a napasamak.
