Dalan a mapan iti lugar a nakakitaan dagiti otoridad ti marijuana plantation
VIGAN CITY – Insayangkat dagiti kameng ti Sugpon Municipal Police Station iti marijuana eradication iti kabanbantayan a paset iti boundary ti Sugpon ken Benguet.
Segun kenni Police Lt. Jerry Arzabal, hepe ti Sugpon Municipal Police Station, adda naawatda a report inaig iti plantasyon iti marijuana iti kabanbantayan idiay Sugpon isu a nangiwayatda iti operasyon ket nakitada dagiti naimula a marijuana.
Malaksid iti dayta, sakbay iti operasyon da idi kalman ket adda pay iti insayangkatda nga operasyon idi napalabas a bulan iti isu met laeng a kabanbantayan ngem sabali a paset iti naka-alaan da ti marijuana.
Pakabuklan ti innem a milyon sangagasut pito pulo ket pito a ribo a pisos a gatad iti marijuana iti pinarot ken dinadael da a pakaibilangan ti dua pulo ket maysa a ribo lima gasut innem a pulo a pisos a gatad iti fully grown marijuana; sangapulo ket tallo a kilo iti napagango a marijuana ken nasurok kumurang a maysa ribo a bukel ti marijuana.
Narigat a mauli iti nasao a bantay ta no aggapo iti sentro ti Sugpon ket mapatta patta a sangapulo ket dua nga oras iti pananguli da iti nasao a bantay ket no aggapu idiay Kibungan, Benguet ket mapan a walo agingga sangapulo nga oras iti panaguli sakbay a madanun iti nakaimulaan dagiti marijuana nga isu iti makitkita a rason ni Arzabal nu apay nga idiay iti napili dagiti cultivators a pangimulaan ti marijuana.
