Mapatta-patta a 68.43 million a Pilipino iti agbotos ita nga aldaw tapno agpili iti baro a liderato iti national ken local election kas kinuna ti Commission on Elections (Comelec), May 12, 2025.
Iti listaan ket umabot iti 4.3 million a Pilipino iti umuna a gundaway nga agbotos iti national elections ita a tawen.
Pinalagipan ti Comelec dagiti botante a kompletoen ti listaan dagiti kandidato a botosanda.
Para iti national elections ket mabalin nga agbotos iti agingga sangapulo ket dua a sendor ken maysa a party-list idinto a nu local position ket karaman kadagiti mapagpili a mabotosan ket ti kongreso, gobernador, bise gobernador, dagiti miembro ti provincial board, mayor, vice mayor ken dagiti konsehal.
Sakbay iti panagpili ket rumbeng a maawat dagiti botante ti Voter’s Information Sheet (VIS) a naglaon kadagiti napapateg a detalye kas ti presinto, voting center, ken sample ballot.
Mabalin pay nga aramaten ti Comelec Precinct Finder online tapno sapulen iti eksakto a lugar iti pagbotosan.
Ti regular a panagbotos dagiti botante ket madamdama iti oras iti alas syete ti bigat agingga alas syete iti malem idinto a nangrugi itay pay alas singko kadagiti senior citizens, Persons with disability, masikog ken kaduada.
