Umaboten iti 998 ti bilang dagiti mannalon a naapektaran kadagiti naglabas iti bagyo a nakaawat iti claims da manipud iti Philippine Crop Insurance Corporation.
Iti pannaki-uman ti Bombo Radyo Vigan ken ni Mercury Pascua, Provincial Extension Office Supervisor, 828 a tseke ti naiwarasda kadagiti 789 a mannalon manipud kadagiti sangapulo ket maysa nga ili iti District 1.
235 met a tseke ti naiwaras met kadagiti 209 a mannalon manipud kadagiti uppat nga ili iti District 2.
Nupay kasta, umaboten iti 5.7 million a pisos a gatad ti tseke ti naiwarasda manipud kadagiti naisayangkat a distribution ceremony.
Kiddaw ti opisial kadagiti saan pay a nakaawat a mannalon nga addanto pay dagiti sumarsaruno a batch ta ikagkagumaanda met nga iwaras iti kabiitan a panawen.
Pinalagipanna met dagiti nakaimula manen a mabalindan nga ipa-insure dagiti mulada – kasapulan laeng nga itugot ti RSBSA number ken photocopy ti valid ID.
