VIGAN CITY – Nasurok limapulo a ribo nga Overseas Filipino Workers ti nakaituding nga irepatriate pay ti Department of Labor and Employment kas pinasingkedan ni Sec. Silvestre Bello III.
Iti pannaki-uman ti Bombo Radyo Vigan ken ni Bello, 478,000 ti bilang dagiti napaawiden nga OFW ditoy pagilian sipud nangrugi ti Covid19 pandemic ken agpapadada a naikkan iti sangapulo a ribo a pisos a tulong pinansial isu nga addan iti sangapulo a bilion a pisos nga inted ti ahensya kadakuada.
Kabayatanna, dua gasut a dolyar met ti naited kadagiti OFW nga adda pay laeng iti deployment area da a saan a nakaawid ngem awan trabahoda.
Impasigurado ni Bello a nasurot ti kayat ni Presidente Rodrigo Duterte a matulongan dagiti amin nga adda iti formal, informal sector, overseas pakairamanan dagiti side walk vendor.
Kabayatanna, baklayen met amin ti Overseas Workers Welfare Administration dagiti magastos iti panagawid ken panagquarantine dagiti OFW.
Lima a bilion a pisos ti impaay ti presidente a repatriation fund isu nga awan ti parikut ta maited amin ti kasapulan dagiti OFW nga agawid.
