Nakaawat ti Philippine National Police (PNP) iti nasurok 500 nga impormasion ken dagiti tip mainaig iti ayan ni dati a senador Ronald “Bato” dela Rosa, segun ken ni PNP Chief Police General Jose Melencio Nartatez Jr.
Pinasingkedan ti PNP a beripikado dagiti naawat nga impormasion ken naisayangkaten ti operasion iti nadumaduma a paset ti pagilian, agraman ti Mindanao, Visayas, Bicol ken Luzon.
Nupay kasta, saan pay a natunton ni Dela Rosa, a sapsapulen ita ti International Criminal Court (ICC) gapu iti kaso a crimes against humanity a nagtaud iti war on drugs ni dati a Presidente Rodrigo Duterte.
Agtultuloy ti manhunt dagiti awtoridad, idinto a nangidiaya ti gobierno iti P50M a gungona para iti impormasion a mangidalan iti pannakakemmeg ti senador.
