VIGAN CITY – 410,576 doses ti AstraZeneca vaccine ti gatangen ti Ilocos Sur provincial government nga agpaay kadagiti residente kangrunaan dagiti frontliner, healthworker ken senior citizen.
Iti pannaki-uman ti Bombo Radyo Vigan ken ni Gov. Ryan Singson, addan letter of intent ti provincial government iti AstraZeneca ket namnamaenda nga iti kabiitan a panawen ket mapatgan ti nasao a banag.
Dua gasut a milion a pisos ti inlatang ti provincial government para ti bakuna pakairamanan ti gastusen iti panaggatang kadagiti syringe, personal protective equipment, pagpasueldo ken refrigerated van a pakaikabilan iti bakuna.
Malaksid ti dayta, adda vaccination plan a nabukel tapno naur-urnos ti proseso iti panaggatang, panangkita iti listaan dagiti mabakunaan ken dagiti vaccination site.
50-70 percent iti bakuna ti ipaay ti national government kada probinsia isu nga iti 30 percent ti populasyon ti nangkontaranda tapno supusupan ti kurangna.
