Nasurok uppat a gasut dagiti illegaly posted campaign materials nga inikkat ti Commission on Elections-Sta. Cruz, Ilocos Sur kabayatan iti linawas a panangisayangkatda iti OPLAN Baklas.
Iti pannaki-uman ti Bombo Radyo Vigan ken ni Election Officer Elvirita Dandin, ti 426 nga illegal campaign materials ket ad-adu no yarig kadagiti naglabas nga operasyonda.
Dagiti pay laeng campaign material ti senador ken partylist ti inikkatda ta saanda pay mabalin nga agikkat kadagiti local candidate.
Ikkanda met iti gundaway dagiti naglabsing a pagpalawagen ida no apay a kadagiti saan a husto a lugar ti nangipaskilanda dagiti campaign material-da ta iti sumaruno a panaglabsingda ket posible a mapatulodandan iti show cause order.
Dagiti nabaklas ket agyan pay laeng iti opisinada ta yurayda iti pammilin no mabalindanton nga ibelleng.
Kabayatanna, impasigurado met ni Election Supervisor Atty. Marino Salas nga agtultuloy ti inda panagbaklas.
Dayta ket uray no agkurang ti personnelda, ta adda met dagiti deputized agency a katinnulongda.
Impanamnamana met a mangrugi met inton March 28 ta adda dagiti iligal a nakaipaskil a campaign paraphernalia dagiti local candidate ket agikkatda latta.
