Impaganetget ni House Prosecution Panel Spokesperson ken Impeachment Trial Adviser Robert Barbers a saan a lisensia ti 32.2 milion a botos a naala ni Vice President Sara Duterte idi 2022 elections tapno aramaten iti madi a wagas ti pondo ti pagilian.
Segun ken ni Barbers, saan a lisensia iti kaadda ti saan a maipalawag a kinabaknang, bribery wenno panangpasuksok kadagiti sumagmamano nga opisial ti Department of Education, ken panangpangta iti biag da Presidente Ferdinand Marcos Jr, First Lady Liza Marcos, ken dati a House Speaker Martin Romualdez.
Sungbat dayta ni Barbers iti argumento nga imbaga ti lead defense counsel a ni Atty. Sheila Sison iti umuna nga aldaw ti impeachment trial a saan a maikkat iti puesto ti bise presidente gapu laeng ta nakaala iti 32.2 milion a botos.
Segun ken ni Barbers, nalawag a nailanad iti Konstitusyon a dagiti mekanismo, kas ti impeachment, tapno madusa dagiti nangato nga opisial ti gobierno a nangabuso iti turay ken naglabsing iti linteg.
