Maipagarup nga adon dagiti nabalud ken nakaswan manipud iti naibutaktak ti nalawa a korapsion iti flood control ken dadduma pay a public infrastructure project iti pagilian.
Segun ken ni Department of Public Works and Highways (DPWH) Sec. Vince Dizon, maawatan ti administrasion ti rurod ti publiko iti naibutaktak a nalawa a korapsion ngem masapul latta nga agannad ti gobierno iti panagpila ti kaso kontra kadagiti karaman.
Umaboten iti nasurok tallopulo nga indibidwal ti naibalud ken nakaswan manipud idi 2025 State of the Nation Address (SONA) ni Presidente Ferdinand Marcos Jr.
Dagituy ket saan laeng a simple a personalidad ngem maysa isuda nga agpampanday linteg, DPWH officials, District engineers, contractors, ken uray pay dagiti secretary a dinutokan ni presidente Marcos.
Innayon ni Dizon a saan a nadaras ti panagisayangkat ti case build up ken serye ti imbestigasion, isu a siguradoen ti administrasion a saan a basta maibasura dagiti naipila a kaso kontra kadagiti karaman iti korapsion.
