Nasurok dua gasut nga agad-adal iti Burgos Memorial School West ti naidalan iti anemia screening nga inrusat ti Ilocos Sur Medical Society.
Ti proyekto ket napaulwan iti ‘Power Up, Kids! Fighting Anemia Through Early Screnning with ISMS’.
Iti pannaki-uman ti Bombo Radyo Vigan ken ni Dr. Glenda Rabino, manamnama nga ad-adunto pay nga ubbing ti maidalan iti screening babaen iti panangitultuloyda iti nasao a gannuat.
Ti anemia ti agtaltalinaed a kangrunaan a nutritional problem kadagiti Pilipino nga ubbing ket ditoy probinsia, adu nga ubbing ti saan a masansan a maidalan iti anemia screening gapu iti kinakurang ti access, awareness ken resources.
Bigbigen ti ISMS daytoy a parikut ken ti nasken a pannakatignay ti nasao a parikut iti salun-at.
Kabinnulig ti ISMS ti City Health of Vigan, Department of Education, Red Cross, Rotary Club of Vigan and Magsingal ken dagiti dadduma pay a stakeholder.
