VIGAN CITY- Nakasaganan dagiti medical teams a maideploy kadagiti playing venues ken billeting school inton Palarong Pambansa 2018 kas pinasingkedan ni Dr. Carmeliza Singson ti Provincial Health Office.
Segun ken ni Dr. Singson, idi pay laeng napan a lawas ket nangrugin iti panagpasyar dagiti miyembro iti medical team kadagiti billeting school ket insingasing da a maisayangkat iti fogging kadagiti pagadalan a pagtarusan to dagiti atleta ken miyembro ti delegado manipud kadagiti sangapulo ket pito a rehiyon iti pagilian.
Kinunana, 266 a medics iti nakasagana para iti panangipasigurado a natalged ken awan iti pagparikutan iti salun-at dagiti atleta ken dadduma pay a delegado.
Malaksid iti dayta, kumpleton dagiti agas ken medical supplies.
Iti sabali a bangir, nagpalagip iti mangidaulo ti Provincial Health Office kadagiti ambulant vendors kadagiti billeting schools ken playing venues a kasapulan da iti mangala iti health ID kadagiti Rural Health Unit (RHU) iti ili a paglakwan tapno mapalubusan nga aglako.
