VIGAN CITY – Pinasingkedan ni Bombo International Correspondent Lia Grey a taga- Lidlidda ngem agtrabtrabaho kas head nurse ti Royal Medical Complex idiay Dammam, Saudi Arabia a naka-confine iti ospital idiay Dammam dagiti lima a kumpirmado a kaso ti coronavirus disease 2019 idiay Saudi Arabia.
Dayta iti impormasyon a saan nga ibagbaga ti Saudi government kadagiti kameng ti media ngem kas maysa a health practitioner ket ammo da Grey nu ayan na dagiti nasao a pasyente.
Innayon na a manipud iti nasurok a pito pulo a sinapul dagiti otoridad a nakapinnulapol dagiti dua nga immuna a nagpositibo iti nasao a sakit, lima pulo (50) kadakuada iti napaneknekan a saan a naapektaran ti COVID idinto a dagiti dadduma ket naka-quarantine da pay laeng.
Nu met suplay ti face masks, alcohol ken sanitizer iti pagpapatangan, inpasigurado na nga umanay pay laeng agsipud ta awan met iti panic buying a mapaspasamak iti lugar da.
