VIGAN CITY- Awan ti akin-kukua wennu caretaker a nakemmeg dagiti otoridad a nangiwayat ti marijuana eradication iti nagbeddengan ti Sitio Nagawa, Barangay Caoayan, Sugpon ken Sitio Bekes, Barangay Tacadang, Kibungan, Benguet idi March 6 ngem ammo dagiti otoridad nu siasino dagiti kasoan da.
Segun ken ni Police Inspector Roldan Razonable, hepe ti Sugpon municipal police station, arigna ag-sangapulo ket dua nga oras da a pinagpagna ti lugar a nangparotan ken nangdadaelan da kadagiti mula a marijuana ta manipud iti alas dyes ti rabii ket nakadanun da iti alas onse y media ti bigat ti March 6 iti lokasyon ti plantasyon ti marijuana.
Dua a milyon, lima gasut ket uppat a pulo ribo a pisos ti pakabuklan a gatad na iti innem a ribo pito gasut a fully grown marijuana ken sangapulo kilo a napagango a bulong ti marijuana a pinarot ken dinadael dagiti otoridad iti nasao a lugar.
