Impasigurado ti Department of Social Welfare a nakasaganan ti nasurok 2.1 million a family food packs kadagiti critical, strategic area kas paset iti panagsaganada iti iduduprak ti bagyo Tino iti Visayas ken Mindanao.
Segun ken ni DSWD spokesperson ken Assistant Secretary Irene Dumlao, ti panagsagana ket paset iti Buong Bansa Handa program a ti gagemna ket masigurado ti makanay dagiti food ken non-food item nga adda kadagiti regional, provincial, ken municipal warehouse kadagiti lugar a maapektaran iti bagyo.
Narugian ti panagsagana idi pay laeng napan a lawas tapno masigurado a ti 2.1 million a family food packs ket adda kadagiti critical warehouse iti intero a pagilian.
128,000 a family food pack ti nakasagana a maiwaras iti Region VIII wenno Eastern Visayas; 89,000 food packs iti Region VI wenno Western Visayas; ken nasurok 81,000 food packs iti CARAGA region.
