Umaboten iti maysa milion a pasyente ti natulongan ti programa a Zero Balance Billing.
Segun iti Department of Health, naserbianen ti programa ti 1,078,164 a pasyente manipud idi Hulyo, uppat a bulan kalpasan ti State of the Nation Address ni Presidente Ferdinand Marcos Jr.
Nainget nga ipatungpal ni DOH Secretary Ted Herbosa ti full implementation iti Zero Balance Billing kadagiti 80 a DOH hospital ken impasiguradoda a nadaras ti proseso kadagiti mabayadan.
Sumagmamano kadagiti ospital ti nangipatungpal iti paperless billing, a direkta a maipan iti katre ti pasyente ti resibo a mangipakita iti zero payment.
Karaman kadagiti sakup ti programa dagiti kumplikado a medical procedure a minilion a pisos ti gatad, professional fee ti doktor ken agas a kasapulan ti pasyente.
