VIGAN CITY – Umabot ti P16,160 iti gatad ti meat products a naala iti Ilocos Sur Provincial Animal Quarantine kalpasan iti pannakasalama ti maysa a closed van iti naisayangkat a checkpoint idiay Brgy. Banaoang, Bantay itattay parbangon.
Nabigbig ti nagmaneho ti closed van a ni Bernales Manaois, agtawen ti tallopulo ket siam nga agnaed idiay 27G Bayaoas, Urdaneta City, Pangasinan ken ti kaduana a ni Mark Denver Valdez, agtawen ti duapulo, baro nga agnaed idiay Anonas, Urdaneta City, Pangasinan.
Maibasar iti insiyal nga imbestigasyon, naggapo idiay Laoag City dagiti naglabsing nga agturong koma idiay Urdaneta City, Pangasinan a nag-apply ti border pass iti Provincial Animal Quarantine Checkpoint idiay Brgy. Tapao, Sinait ngem nasalamaanda iti Animal Quarantine Checkpoint idiay Brgy. Banaoang, Bantay a nakaalaan iti 23 kgs iti Longanisa, 6kgs iti pork ribs, 5kgs iti pork chop, 14kgs iti liempo, 9kgs ti pigue, 12kgs iti Pork Balawas ken 1kg ti pig tail nga awan iti permit wenno travel document-na.
Dagiti nasao meat product ket naorder manipod ken ni Rosemarie Jane Agcaoili nga agnaed idiay Brgy.28, San Fernando, Laoag City babaen ti online ken maideliver koma ken ni Roda Valdez nga agnaed idiay Anonas, Urdaneta City, Pangasinan.
Nupay kasta, babaen ti pannaki-uman ti Bombo Radyo Vigan ket nagkiddaw iti pammakawan ni Manaois ti amona a taga-Cabugao ta nairaman iti luganda iti madi nga aramidna ket imbalakadna kadagiti dadduma nga agar-aramid iti saan a maiparbeng nga isardengdan.
Kabayatanna, pinasingkedan ni Provincial Animal Quarantine Officer Martel Quitoriano nga isublida dagiti naalada a meat products nulaketdi makabayadda iti muelta tapno isudan iti makammo iti disposition-na.
