Naipatulod ti nasurok sangagasut a puersa ti kapulisan iti probinsia ti Abra kalpasan dagiti nagsasaruno a pasamak ti pammaltog.
Dagitoy a puersa ti kapulisan wenno augmentation forces ket naggapu kadagiti nadumaduma a probinsia ti Cordillera Administrative Region.
Iti pannaki-uman ti Bombo Radyo Vigan ken ni Acting Governor Rusell Bragas, ti ili ti Bangued ti naipatulodan iti ad-adu a puersa gapu kadagiti pammaltog a napaspasamak kadagiti naglabas nga aldaw.
Kinuna ni Bragas a saanen a normal ken makapaalarma dagiti agsasaruno a kinaranggas a mapaspasamak iti nasao a probinsia a pakatkatayan dagiti agindeg isu nga yunay-unayna ti naan-anay a presensya ti kapulisan ta napateg a ti pokus ket maliklikan dagiti kastoy a pasamak a pagbutbutngan dagiti Abreño.
Panawaganna met kadagiti agindeg ti inda panagridam ken pannakitinnulong kadagiti otoridad tapno masolusyonan dagiti kastoy a pasamak.
Iti agdama, sangapulo ket piton ti bilang dagiti pammaltog sipud nangrugi ti election period idi Enero agingga ita a bulan.
