VIGAN CITY – Pinasingkedan ni Sta. Lucia Mayor Joseph Simon Valdez nga imbes nga alas dyes iti rabii agingga alas singko iti bigat ti curfew hour ket maisapsapa iti alas otso iti rabii agingga alas singko iti bigat kas kiniddaw dagiti kapitan ti tunggal barangay.
Iti pannaki-uman ti Bombo Radyo Vigan ken ni Valdez, napagtutulaganda ti nasao nga addang bayat ti pannakaisakup ti ili iti Modified Enhanced Community Quarantine ta napaliiw dagiti kapitan a naur-urnos dagiti barangay no maisapsapa ti curfew.
Impasigurado ni Valdez a naipatuloden dagiti tulong kadagiti barangay nga apektado kangrunaan iti Brgy. Alincaoeg ken Palali Sur a na-lockdown dagiti dadduma a pasetna.
Mapagpapatanganto pay ti pannakaipaay met ti tulong kadagiti barangay official ta ipangrunada pay laeng ti mangted kadagiti naapektaran ken dagiti lugar nga adu ti kasona iti Covid19.
Nupay kasta, nagpalagip ti mayor a dagiti saan nga essential ket saanda pay laeng a rumrumuar tapno maliklikan ti panagwaras ti virus ta dagiti aglabsing kadagiti pagannurotan ket mamuelta.
