VIGAN CITY – Pimmusay gapu ti cardiac arrest ni Narvacan Vice Mayor Joseph Tejada, agtawen iti tallopulo ket dua, agnaed iti Barangay Quinarayan, Narvacan.
Immuna a nadungpar ni Tejada babaen ti minanehona a motorsiklo idiay Barangay Langlangca 2nd, Candon City ni Estelita Gacutan, agtawen iti pitopulo ket lima, agnaed iti Barangay Langlangca 2nd.
Agpapaabagatan ti motorsiklo a minaneho ni Tejada idin ta nadungparna ni Gacutan a bigla a bimmallasiw iti kalsada.
Naipaagas ti ospital ni Gacutan ngem dead on arrival idinto a ni Tejada ket boluntaryo met a simmuko iti Candon City Police Station idin ta bigla a naglusdoy ket naitaray iti St. Martin de Pores Hospital ngem natay bayat ti pannakatamingna.
Pinasingkedan met ni SBM Joven Ampo nga isu ti naudi a nakadua ti bise mayor nga awan ti pagilasinan nga isun ti maudi a gundawayna a makadua itay nagiwarasda iti fingerlings kadagiti mangngalap iti ili ti Narvacan.
Nakapakada pay laeng nga adda mapanna daw-asen a pyesa idiay Tagudin isu a nagmotor agsipud ta nabayag metten a saanna a naus-usar idin ta idi malpas ti programada ket adda dagiti timmawag kenkuanan maipanggep iti napasamak iti bise mayor.
