VIGAN CITY – Pinasingkedan ni dati nga Ilocos Sur Governor ken agdama a Narvacan Mayor Luis Chavit Singson a nagorder ti agas idiay China kontra ti COVID agsipud ta ti nasao a pagilian ket nakontroldan iti panagraira ti nasao a sakit babaen iti agas nga inaramatda.
Segun ken ni Singson, impakaammonan iti national government ken iti Department of Health ti nasao a banag ket nakadependenton kadakuada no aprubaranda ti panagaramat iti agas para kadagiti apektado iti virus.
Kabayatanna, kiddawen ti mayor a maipakaammo kadakuada no adda man dagiti maduktalan nga aglabsing kadagiti paglintegan a naipatungpal iti ili ti Narvacan kas ti social distancing ken ti pannakalimitar dagiti sumrek kadagiti nadumaduma a pagtagilakuan tapno saan nga agdudupudup dagiti tao.
No man pay adu dagiti agar-aramat ti face mask tapno maliklikan ti virus ket ingunamgunamna a nasaysayaat latta no agiinnaddayo ti tunggal maysa ta uray no ti panangited ti tulong ket saan a dagiti umili ti mapan mangala no di ket maipatulod kadagiti barangay.
