VIGAN CITY – Ad-adalenen ti Narvacan LGU iti posible a pakayakaran iti warehouse ti ganagan tapno saanen a maulit ti napasamak a pannakatakaw ti aggatad iti PHP67,000 a ganagan.
Iti pannaki-uman ti Bombo Radyo Vigan ken ni Mayor Atty. Pablito Sanidad Sr., aminado a mabalin a ti nagbiddutanda ket ti panagtalekda unay kadagiti umili nga awan ti manggundaway uray no nawaya ti lugar ti nakaidulinan dagiti ganagan
Malaksid dayta, saanda met a namnamaen nga adda makapanunot a takawan ti munisipio.
Gapu dayta, manamnama ti pannakayendorso ti pasamak iti Provincial Prosecutor’s Office tapno maadal no ania ti maipakat a pannusa kadagiti nagtakaw ken dagiti gimmatang.
Kabayatanna, binilin ni Mayor Sanidad ni Municipal Agriculturist Garry Cardona a mangaramid iti inventory dagiti stock a ganagan tapno maduktalan no siguden a naknaksayan a saan a nadnadlaw.
Impanamnama met ti mayor kadagiti umili nangruna kadagiti mannalon a pakaipaayan koma dagiti ganagan a natakaw nga awan ti nasken a pagdanaganda ta suportaran latta ida ti agdama nga administrasyon ken maited latta ti pagrebbenganda.
Kabayatanna, immuna metten nga inlawlawag ni Municipal Agriculturist Cardona nga awan ti mabalin a mairuar a ganagan no awan ti bilin ti munisipio.
Binallaaganna met dagiti umili a saanda pulos a gandaten nga aramiden ti napasamak ta saan a rebbengna a mapukaw dagiti kukua ti gobierno nga agpaay kadagiti mannalon iti ili.
