VIGAN CITY – Maisagsagaan ti pannakaiwaras iti kada pamilia iti “Narvacan Ako Multi-Purpose Card and App” iti ili ti Narvacan ta gagem ni Mayor Chavit Singson a mairamanda iti benepisyo babaen ti kaadda ti digitalized bank account iti Union Bank.
Ti Narvacan Ako Card ket napagkaykaysa a features ti ATM card, Debit card, ken Visa card a mabalin a mausar iti panagroceria kadagiti department store ken mabalin pay a pagbayad kadagiti bill kas ti danum, koriente, mobile phone ken online purchases gapu ta daytoy ket debit card ken visa card kasta payen a saan a kasapulan ti maintaining balance.
Malaksid ti dayta, mabalin pay nga aramaten iti abroad ken gapu ta digitalized, ti Ilokano Ako Card ket addaan iti Ilokano app a mabalin a mai-install iti smartphone wenno computer tapno nalaklaka nga imanehar ti baro a bank account.
Maysa a super app ti Ilokano App ta mabalin pay nga e-wallet a mausar iti transaksyon kas ti money transfer, bank transfer, money remittance, ken pagbayad kadagiti ginatgatang iti online.
Mabalin pay nga aramaten no agipatulod iti kuarta a saanen a kasapulan ti mapan kadagiti bangko.
