Umaboten iti P248 million ti gatad a narekubre iti gobierno manipod kadagiti nakaawat ti kickbacks manipod iti maanomalya a flood control projects.
Karaman dayta ti 7 million a linaon ti bank account ni dati a DPWH Undersecretary Roberto Bernardo a nagisubli idi November, ngem naka-freeze ita kalpasan a kiniddaw ti Anti-Money Laundering Council (AMLC).
Nairaman ti nagan ni Bernardo a mapapati a mangmangted kadagiti komisyon dagiti kampo da Sen. Jinggoy Estrada, Joel Villanueva, ex-Sen. Bong Revilla, ex-Ako Bicol Party List Rep. Elizaldy Co ken dati a Caloocan Rep. Mitch Cajayon manipod ti flood control projects.
Karaman ni Bernardo iti nagkiddaw iti 25% a kickbacks.
Insubli met ti dati a Bulacan district engineer Henry Alcantara ti P110 million ken P71 million iti Department of Justice, kas paset ti karina nga isubli ti kuarta a naawatna kas kickback iti aplikasyonna tapno agbalin nga state witness.
Ita a bulan met nga insubli ni dati a DPWH-NCR regional director Gerald Opulencia ti nasurok P40 million iti DPJ, kas paset ti commitment-na nga isubli ti P150 million a naalana manipod ti pondo para kadagiti proyekto idiay Metro Manila idi nangidaulo kas director.
