Imparit ti National Police Commission (Napolcom) ti single-use plastics iti uneg iti opisinada kas paset ti tignay a mangiyetnag ti environmental sustainability.
Iti memorandum a napirmaan idi August 28, binilin ni Napolcom Vice Chairperson ken Executive Officer Commissioner Rafael Vincente Calinisan amin a central ken regional offices a kissayan ken nu posible ket ikkatenen iti panagaramat ti disposable plastic iti office activities kas kadagiti taripnong, panagsanay ken conferences.
Dagiti maiparit nga usaren ket ti plastic straw, stirrer, utensils, disposable cups ken food containers, single-use water bottles ken plastic bags.
Naallukoy dagiti empleado nga agaramat ti refillable containers, reusable utensils, eco-bags, ken biodegradable materials.
Kayat nga ipaganetget ni Calinisan ti kultura iti responsibility ken sustainability iti uneg iti pagtrabahoan ken mayataday iti global initiatives kas iti UN Sustainable Development Goals kasta payen ti local government ordinances iti environmental protection.
