VIGAN CITY – Nakemmeg iti entrapment operation ti maysa a balasang gapu iti pananglimlimona ti maysa a negosyante idiay Brgy. San Juan, Candon City.
Segun ti Candon City Police Station, ti suspek ket ni Julie Ann Gaburno Ramos, agtawen ti duapulo ket maysa, awanan trabaho nga agnaed idiay Brgy. San Juan, Candon City idinto a ti biktima ket ni Rhea May Wallang Patil-ao, agtawen ti tallopulo ket innem, business owner nga agnaed met laeng iti nasao a lugar.
Insayangkat dagiti kameng ti Candon City Police Station ti entrapment operation a nagresultaan ti pannakakemmeg ti suspek ta nakaawat ti kahera a ni Jasmine Reyes Sarmiento iti sangaribo a pisos, maysa a limagasut a pisos a marked money kas bayad iti Gcash withdrawal ti suspek.
Inulit manen ti suspek a nagwithdaw iti kuarta babaen ti G-cash iti Trint convenience store a kukua ti biktima nga awan iti aniaman a resibo a naipresentarna.
Umabot iti P22,100 iti in-withdraw ti suspek manipod idi February iti agdama a tawen.
Naala pay kenkuana ti maysa a unit iti vivo a cellphone.
Kabayatanna, naipan ti suspek iti Ilocos Sur Medical Center, Candon City para ti medical examination ken naiyakar iti Candon Police Station ket maisagsaganan ti kaso a maipila kontra kenkuana.
