VIGAN CITY – Dua iti nakemmeg iti naisayangkat nga entrapment operation gapu iti panaglabsing iti RA 10175 wenno Cybercrime Law idiay Brgy. San Pablo, Sto Domingo.
Iti pannaki-uman ti Bombo Radyo Vigan ken ni PCapt. Christopher Ramat, nagkiddaw ti tulong ti biktima a ni Imelda Pichay, agtawen ti limapulo, naasawaan, self-employed nga agnaed iti Purok Mabuhay Brgy. Poblacion Esperanza Sultan Kudarat gapu iti panagblock mail kenkuana ni Jestin Soliven, agtawen ti tallopulo ket tallo, kameng ti LGBT, self-employed nga agnaed idiay Brgy. San Pablo, Sto Domingo.
Segun ken ni Ramat, kidkiddawannan ni Soliven ti nakarelasyon na a ni Pichay iti kwarta ket ibubutengna nga ipatulodna iti video scandal-da ken ti asawana nu saan a mangted.
Napilitan ti biktima nga agipapatulod latta iti kuarta kenkuana isu nga umaboten iti nasurok kumurang a limagasut a ribo a pisos iti naitedna agingga a saannan a kabaelan ket impakammonan kadagiti pannakabagi ti linteg.
Naisayangkat iti entrapment operation ket nakemmeg ni Soliven ken kaduana a ni Wilma Guillermo, agtawen ti limapulo ket lima, balo, book keeper nga agnaed iti nasao a lugar kalpasan a naawatda iti lima ribo a pisos a marked money.
Kabayatanna, nagpalagip ni Ramat ti publiko nga agannad iti pakirelasyonan ken nasaysayaat nu saanen nga ag-video pay tapno saan a maisagmak.
