VIGAN CITY – Nagpanawagan ti dati a secretary ti Department of Health ken agdama nga Iloilo Rep. Janette Garin kenni Presidente Rodrigo Duterte a matignayan iti nangina a presyo iti PCR test kits para iti COVID19.
Dayta ket kalpasan a naduktalan a magatang iti gatad a sangaribo ket lima gasut a pisos iti nasao a test kits ngem ilaklako ti Phil Health iti gatad a walo ribo ket lima gasut a pisos a nangina unay para kadagiti umili.
Iti pannaki-uman ti Bombo Radyo Vigan kenni Garin, ni laeng Presidente Duterte iti makarisut iti nasao a banag ket babaen iti panangkitana a naimbag ti isyu ken namnamaenna a maisubli met la iti dati a presyo wenno maipalaka dagiti nasao a test kits.
Ingunamgunam ti kongresista a saan met a malugi dagiti negosyante, supplier, ospital ken Health Worker ta adda latta iti masapulanda.
