VIGAN CITY – Kalikagum ti Bombo Radyo Philippines a lumawa pay iti madanun da a luglugar babaen kadagiti digital ken terrestrial platforms nga usaren dagiti Bombo Radyo stations kadagiti dua pulo ket uppat a kangrunaan a syudad iti intero a pagilian, dayta ket kagiddan iti panangrugi ti Top Level Management Conference idiay Iloilo City nga agpatingga inton January 11.
Inbutaktak ni Dr. Rogelio M. Florete, chairman emeritus ti Bombo Radyo Philippines a para itatta a tawen, plano da iti mangipatakder pay iti ad-adu nga AM ken FM radio station kadagiti sabali pay a syudad ditoy Luzon, Visayas ken Mindanao.
Kagiddan iti panangawat ni Ms. Margaret Ruth Florete iti responsibilidad iti panangidaulo ti Bombo Radyo Philippines manipud ti ama na a media mogul, inkari na nga itultuloy na dagiti nakairuwamanen ti Bombo Radyo nangruna iti panangiwaragawag iti usto a damag babaen iti kapartakan a wagas a kabaelan dagiti Bombo reporters ken Bombo employees.
Nagsentro iti panagsarita ni Ms. Margaret Ruth Florete ti State of the Network Address na iti tema ti TLMC tatta a tawen nga “In Step with Digital Technology”.
Ti St. Clement’s Retreat House iti venuew para ti makalawas a TLMC ti Bombo Radyo Philippines tapnu ibinglay dagiti participants dagiti nasursuro da idi napalabas a tawen ken maiyuswat iti kailagum ti network babaen dagiti kabaroanan a wagas para iti serbisyo publiko babaen iti panangiwaragawag kadagiti damdamag ken impormasyon ken kadagiti socio-cultural projects a dakkel iti epekto na iti panagbiyag dagiti Pilipino.
Ti TLMC ti Bombo Radyo ket agtinawen a rituwal ti network nga at-atendaran dagiti senior officers, area ken station managers, news directors ken chief technicians manipud kadagiti tallo pulo ket maysa a key cities iti intero a pagilian.
Inimbitaran pay ni Ms. Florete dagiti music lovers a saan da a palampasen ti cultural project ti Bombo Radyo Philippines, ti 3rd National Bombo Music Festival 2020 a pagpabuyaan dagiti 12 a finalists inton January 11 idiay West Visayas State University Cultural Center, La Paz, Iloilo City.
Ti 31-piece Bombo Symphony Orchestra nga idaulwan ni Maestro Gerardo Vicente Muyuela iti mangted iti naidum-duma a musical experience.
Kas nationwide project, gagem ti Bombo Music Festival nga agbalin a paset iti panangpanday iti sirib dagiti Pilipino iti benneg ti musika ken kultura ken mabalin payen a mangngeg wennu mai-download kadagiti amin a digital platformskas ti Spotify, I-tunes, Youtube Music ken Google-Music.
Karaman kadagiti agbalin a judge tatta a tawen ket da Maestro Ryan Cayabyab, national artists ken Magsaysay Awardee in Music; certified gold record producer ken renowned composer Vehnee Saturno; Neo-Soul diva Bituin Escalante,; young hit maker Myrus Ramirez kenni Jesuit composer Father Peter Pojol.
