Nagkiddaw ni House of Representatives Assistant Minority Leader, Gabriela Women’s Party-list Rep. Arlene Brosas, iti pannakapapigsa iti financial intelligence monitoring kontra iti online sexual exploitation of children (OSEC) kalpasan a nasentensiaan iti duapulo ket lima a tawen a pannakaibalud ti maysa a French animator a nangibilin iti live-streamed rape kadagiti preteen girls.
Segun kenni Brosas, ti pannakasentensia ti French animator a ni Bouhalem Bouchiba gapu iti panangrames kadagiti ubbing a Filipino babaen kadagiti live-streaming platforms ket “very disturbing” isu a nasken a mapasayaat ti financial monitoring systems kontra online sexual exploitation of children ti pagilian.
Natakuatan ti Paris court a guilty ni Bouchiba, maysa a nalatak nga animator, iti pakainaiganna iti panangrames iti ginasut a babbalasitang, human trafficking, ken panabuya ti child pornography iti online.
Nagbalin a nalatak ni Bouchiba para iti obrana kadagiti Pixar ken Disney animation studios, a nagkontribusion kadagiti blockbuster a kas ti 2004 hit, “The Incredibles,” ken “Ratatouille” idi 2007.
Agbayad ni Bouchiba kadagiti babbai a Pilipino gapu iti rape ken sexually assault kadagiti babbalasitang nga agtawen iti lima agingga iti sangapulo iti sango ti video recorder, bayat ti panagbuya ni Bouchiba babaen ti livestream idi tawen 2012 ken 2021.
